مع كل انشغالي قبل السفر للإجازة بيومين، لا أريد أن أقفل على ما حدث معي اليوم في درج النسيان... الموقف اليوم مع السورية للطيران مضحك ومبكي في آن... وهو بكل تأكيد نسخة مصغرة عن كيف تجري الحياة في بلد كامل اسمهُ سوريا.
قطاع الطيران في سوريا عار على السوريين... فكل تفصيل في هذا القطاع تستطيع التحدث عن مشاكلهِ حتى الصباح... فمن أين نبدأ ؟؟
سأتحدث فقط عن موضوع الحجز والإستعلامات ...
حبيت أعرف مواعيد الطيران الداخلي من دمشق إلى اللاذقية وبالعكس... وبكل براءة فتحت موقع السورية للطيران ! موهيك بيعمل كل بني آدم بدو يشوف مواعيد شركة معينة !!! بس بصراحة البراءة والعفوية يلي فتحت فيها الموقع اتضحلي أنها بلاهة... بلاهة لأني من المفروض أعرف لحالي أنو نحنا بسوريا آخر شي منفكر فيه هو تسهيل حياة بعضنا البعض... !!
موقع السورية للطيران مافيو حجز عن طريق الإنترنت... أوكي مو مشكلة... في ظروف ببلدنا تتعلق ببطاقات الإئتمان وغيرو وغيراتو... منتفهم هالحكي... بس أما أنو مايكون في جدول لمواعيد الطيران !!!!! مايكون في ولا برنامج مواعيد لإقلاع الطائرات من مطارات سورية!!! ولاشي بتقدر تستفاد منو غير صورة فلاش لا تقدم ولا تؤخر تبتشرك أنو ما تيأس!! عمّا قريب رح نصير بشر ... (الصورة محطوطة ببداية المقال)
وعلى ماقال لي أحد الأصدقاء هذهِ الصورة لها قرابة العام كما هي... ولمّا يأتي بعد النظام الجديد المرتقب !!
موهون القصة... محور القصة أنو حكيت مع المكتب بدبي، مشان أستعلم عن المواعيد... طبعاً ساعتين عم دق وماحدا عم يرد، وهي أول مرة بتصير بدبي، أنو أتصل على محل أو مكتب أو شركة وماحدا يرد... هاد الشي بخلي الزبون يروح ويمكن تخسرو الشركة... ! مشان هيك أول مرة بصير بدبي.
اتصلت على رقم موبايل أحد مسؤولي مكتب السورية للطيران بدبي (بلا ذكر أسماء رجاءً... بركي طلع مدعوم!) وهذا مادار من حوار، بالمناسبة جبت الرقم من الموقع (وهي المعلومة الوحيدة المفيدة بالموقع)...
أنا: مرحبا أخي ، عم أتصل على مكتب الشركة وماحدا عم يرد...
هو: له له ... الله يصلحهم للشباب... مابعرف ليش ماعم يردوا....
أنا: طيب أنا بدي أستعلم وأحجز ... مين فينو يساعدني؟؟
هو: قلي شو بدك ؟؟؟؟
أنا: بدي أعرف شو في طيران من دمشق للادقية وبالعكس، وشوفي طيران من دمشق لدبي بتاريخ 1 أوكتوبر...
هو: مايهمك، نحنا من تاريخ 1 نوفمبر عنا مواعيد مناسبة جداً للجميع...
أنا: عفواً بس أنا بدي المواعيد بأوكتوبر...
هو: لك إي عم قلك من أول نوفمبر في مواعيد ظريفة !!!
أنا: بس أستاذي !!! أوكتوبر قبل نوفمبر ... يعني لسا ما بكون بلش برنامج رحلاتكم الظريف !!!
هو بعد صفنة شي نص دقيقة .: إي والله بهي غلبتني (على أساس نحنا عم نتصارع)
أنا (مندهشاً): طيب هلق شو ؟؟؟
هو: والله أنا هلق مافيني ساعدك.... قاعد بالبيت عم أشرب متة!! اتفضل هههه ... بدك تحكي مع المكتب !!!
أنا(مستغرب ومندهش): بس حكيت مع المكتب كتير وماحدا رد.. !
هو: طيب خود هيدا رقم موبايل (فلان) واتصل فيه... وبالله قلو أنو اتصلت بأبو (فلان) وعطاني رقمك، وقلو بقلك أبو(فلان) ليشم اعم تردوا عالتلفون ؟؟؟
وسكرت التلفون، وإذ أصدقائي بالشغل عم يضحكوا علي... كيف كنت عم قلو أنو أوكتوبر قبل نوفمبر... وكيف عم أتصل تلفون لأعرف مواعيد الرحلات! كيف بتصل وفي مواقع إنترنت؟؟؟!!!؟!؟ منيح ماكانوا عرفانين أنو ناقلنا الوطني ماعندو موقع محترم، وأنا ما قلتلهم الحقيقة مشان سمعتنا تبقى جيدة !
بالآخر حجزت بالإماراتية للطيران روحة رجعة عالشام ... بخمس دقائق على الإنترنت...
وطلبت من أمي تنزل على مكتب السورية للطيران باللادقية لحتى تحجزلي الرحلات الداخلية بين دمشق واللاذقية...
شغلة أحلى: بمطار اللادقية يلي كلو على بعضو غرفتين وصالة، إذا بدك عربية تحط عليها شناتيك: يا بتاخد عربية مصدّاية ومابتمشي .... يا أما بدك تدفع مصاري لحتى تاخد عربية تعمل... قمة الرقي مو هيك... نحنا المطار الوحيد بالعالم يلي بياخد مصاري على العربيات... عم قلكم نحنا فريدين من نوعنا.
أهم شي دعولي مانام ببيت خالتي بعد هالحكي...
كاسك يا وطن
موريس عبد
صاحب ومدير موقع سوق سورية الموقع الأفضل للإعلانات المبوّبة المجانية في سورية
0 التعليقات:
إرسال تعليق